专家拆局：多蒙特难炒慕逊加柏

后防甩漏神锋养伤

周六晚德甲压轴演好戏，多蒙特主场迎战一哥慕逊加柏，多蒙特近8次对赛赢晒，往绩一面倒，不过球队近期频频失分，防线轮流犯大错甩漏极多，加上首席射手柏高艾卡沙因伤缺阵，面对弗爆嘅慕逊加柏并冇赢波把握，仲要让球一球、球半未免过分，黑柴推介下盘。

多蒙特联赛3连和不停失分，对手仲唔係劲旅，积分榜已经跌至第8位，最惨係连续3仗都失两球，防线轮流犯错，被寄予厚望嘅中坚文路尔艾简治踢到冇晒信心，今仗仲有首席射手柏高艾卡沙养伤，前线火力大减，虽然主场出击有追分决心，但以近况计实在冇条件让到咁多，更何况下周中欧联要同国际米兰踢关键战，今仗就算领先咗亦唔会去得太尽。

德甲近两轮客队大旺

慕逊加柏经过8年等待，喺新帅马高路斯带领下终于过到一哥瘾，当然唔希望咁快落番嚟，球队近期联赛4连胜，前线入波仲一仗比一仗多，除咗3位攻击重心柏利亚、马古斯杜林同比列安保路踢出流畅嘅组织进攻外，连经常因伤长抖嘅好波之人靴尔文都弗番晒，令到前线争位情况严重，近期整体演出明显在多蒙特之上。何况今季德甲大旺客队，经过7轮63场比赛，主胜只有23场，客胜就有25场，如果单计近两轮，客队更取得10胜5和仅3负佳绩，慕逊加柏今季更加係3场作客全胜添！虽然佢哋今仗有守将马菲亚斯真达缺阵，右闸史堤芬拉拿上阵成疑，但面对火力减弱嘅多蒙特，大败可能性唔高。