推荐预测：韦斯咸扑杀大黄蜂

韦斯咸扑杀大黄蜂

韦斯咸箭头 米查利安东尼奥

护级6分波抢得就抢

今晚英超独脚戏爆发护级关键战，「锤仔帮」韦斯咸主场硬撼「大黄蜂」屈福特。依家两军同分排下游，仲未摆脱降班漩涡，不过「锤仔帮」主帅莫耶斯不愧为护级专家，临近季尾揿掣疯狂抢分，米查利安东尼奥大爆发佢应记一功，屈福特每逢作客例必脚软，生死关头宁愿信「莫天才」，上盘有计。

虽然以31分排联赛尾3嘅般尼茅夫喺周中以1比2不敌曼城，不过同得34分嘅韦斯咸及屈福特仍未解除降班威胁，为护级喺呢场「6分波」战意唔使怀疑。

以波论波，韦斯咸班底确实唔错，你可以笑主帅莫耶斯唔识带豪门争标，当年喺执掌曼联搞到一镬泡，但佢曾带领爱华顿同韦斯咸成功护级，经验丰富。韦斯咸近4仗联赛取得2胜1和1负，狂抢7分，包括爆冷击败车路士，上仗对诺域治更狂派4蛋，前锋米查利安东尼奥食出大四喜添，「莫天才」将呢位过去多打翼锋嘅英格兰球员转型前锋，即喺近4场轰6粒，收到奇效，成为「锤仔帮」疯狂抢分嘅最大功臣。至于中场就由「老黄忠」麦克卢保带住4件后生仔，活力十足，其中右翼查洛保云自冬季转会窗来投后愈踢愈有，处理角球亦有一手，成就韦斯咸季尾爆发嘅另一个关键。

屈福特作客唔识入波

另一边厢，屈福特虽然连赢2场，但要留意全属主场赛事，兼且上仗梅开二度嘅队长迪尼，今仗因伤上阵成疑，连同长抖嘅迪路菲奥，火力进一步受削弱，何况「大黄蜂」一向客场发挥坚差，近4场联赛作客输晒之馀，仲1粒都入唔到，真係见到都唔开胃。加上近4次交手，韦斯咸获3胜明显格食格，佢哋为尽快上岸必藉地利争胜，让平半上盘值得捧场。